ಹೊಸ ವರ್ಷದಂದೇ ನತಾಶ ಅವರೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡ ಹಾರ್ಧಿಕ್ ಪಾಂಡ್ಯ

ಹೊಸ ವರ್ಷದಂದೇ ನತಾಶ ಅವರೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡ ಹಾರ್ದಿಕ್ ಪಾಂಡ್ಯ

ಮುಂಬೈ: ಸರ್ಬಿಯಾ ನಟಿ ನತಾಶ ಸ್ಟ್ಯಾನ್‌ಕೊವಿಚ್ ಅವರೊಂದಿಗಿನ ಸಂಬಂಧವನ್ನು ಬಹಿರಂಗ ಪಡಿಸಿದ ಕೆಲವೇ ಗಂಟೆಗಳಲ್ಲಿ ಟೀಮ್ ಇಂಡಿಯಾ ಸ್ಟಾರ್ ಆಲ್‌ರೌಡರ್ ಹಾರ್ದಿಕ್ ಪಾಂಡ್ಯ ಅವರು ತಾವು ನಿಶ್ಚಿತಾರ್ಥ ಮಾಡಿಕೊಂಡಿರುವುದಾಗಿ ಪ್ರಕಟಿಸಿದ್ದಾರೆ. ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಂ ನಲ್ಲಿ ನತಾಶ ಅವರಿಗೆ ಉಂಗುರು ತೊಡಸಿರುವ ಫೋಟೊವನ್ನು ಶೇರ್ ಮಾಡಿದ್ದಾರೆ. ‘ನಾನು ನಿನ್ನವನು, ನೀನು ನನ್ನವಳು’ ಎಂಬ ಶೀರ್ಷಿಕೆಯನ್ನು ಫೋಟೊಗೆ ಹಾಕಿಕೊಂಡಿದ್ದಾರೆ.

ಇದರ ಬೆನ್ನಲ್ಲೆೆ ಟೀಮ್ ಇಂಡಿಯಾನಾಯಕ ವಿರಾಟ್ ಕೊಹ್ಲಿ ಸಹ ಆಟಗಾರನಿಗೆ ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ. ಇದಕ್ಕೂ ಮುನ್ನ ಇಂದು ಹಾರ್ದಿಕ್ ಪಾಂಡ್ಯ, ಅವರು ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಂನಲ್ಲಿ ತಮ್ಮ ಪ್ರೇಯಸಿಯೊಂದಿಗಿನ ಫೋಟೊವೊಂದನ್ನು ಶೇರ್ ಮಾಡಿದ್ದಾರೆ. ‘‘ನನ್ನ ಪಟಾಕಿಯೊಂದಿಗೆ ಹೊಸ ವರ್ಷವನ್ನು ಆರಂಭಿಸುತ್ತಿದ್ದೇನೆ’’ ಎಂದು ಶೀರ್ಷಿಕೆ ಬರೆದುಕೊಂಡಿದ್ದಾರೆ.

ಇದರೊಂದಿಗೆ ನಟಿ ನತಾಶ ಅವರೊಂದಿಗಿನ ಸಂಬಂಧವನ್ನು ಭಾರತ ತಂಡದ ಆಟಗಾರ ಸ್ಪಷ್ಟಪಡಿಸಿದ್ದರು. ಇದಾದ ಕೆಲವೇ ಗಂಟೆಗಳಲ್ಲಿ ತನ್ನ ಪ್ರೇಯಸಿಯೊಂದಿಗೆ ನಿಶ್ಚಿತಾರ್ಥ ಮಾಡಿಕೊಳ್ಳುವ ಮೂಲಕ ಎಲ್ಲರಿಗೂ ಆಶ್ಚರ್ಯ ಮೂಡಿಸಿದ್ದಾರೆ. ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ಹಾರ್ದಿಕ್ ಪಾಂಡ್ಯ ಅವರು 2019ರ ಸೆಪ್ಟೆೆಂಬರ್‌ನಿಂದ ಟೀಮ್ ಇಂಡಿಯಾದಿಂದ ಹೊರಗುಳಿದಿದ್ದಾರೆ. ಕೊನೆಯ ಹಂತದ ಪುನಃಶ್ಚೇತನದಲ್ಲಿರುವ ಅವರು, ಮುಂದಿನ ತಿಂಗಳು ನ್ಯೂಜಿಲೆಂಡ್ ಪ್ರವಾಸದ ಭಾರತ ಎ ತಂಡಕ್ಕೆೆ ಆಯ್ಕೆಯಾಗಿದ್ದಾರೆ.

ಆದರೆ, ಶ್ರೀಲಂಕಾ ವಿರುದ್ಧ ಟಿ-20 ಹಾಗೂ ಆಸ್ಟ್ರೇಲಿಯಾ ವಿರುದ್ಧ ಏಕದಿನ ಸರಣಿಗಳಿಗೆ ಭಾರತ ತಂಡದಲ್ಲಿ ಸ್ಥಾನ ಪಡೆಯುವಲ್ಲಿ ವಿಫಲರಾಗಿದ್ದಾರೆ. ಜನವರಿ 22 ರಿಂದ 26ರ ವರೆಗೆ ನಡೆಯುವ ಮೂರು ಅನಧೀಕೃತ ಏಕದಿನ ಪಂದ್ಯಗಳಿಗೆ ಭಾರತ ಎ ತಂಡದಿಂದ ಅವರು ಕಣಕ್ಕೆೆ ಇಳಿಯಲಿದ್ದಾರೆ. 2018ರ ಏಷ್ಯಾ ಕಪ್ ವೇಳೆ ಹಾರ್ದಿಕ್ ಮೊದಲ ಬಾರಿ ಬೆನ್ನು ನೋವಿಗೆ ಒಳಗಾಗಿದ್ದರು. 2019ರ ಐಸಿಸಿ ಏಕದಿನ ವಿಶ್ವಕಪ್ ಆಡಿದ್ದ ಅವರು ನಂತರ, ಭಾರತ ತಂಡದ ತವರು ಸರಣಿಗಳಿಂದ ಹೊರಗುಳಿದಿದ್ದರು. ತಂಡದ ಮ್ಯಾನೇಜ್‌ಮೆಂಟ್ ಜನವರಿ-ಫೆಬ್ರುವರಿಯ ನ್ಯೂಜಿಲೆಂಡ್ ಪ್ರವಾಸಕ್ಕೆೆ ಆಲ್‌ರೌಂಡರ್ ಹಾರ್ದಿಕ್ ಅವರನ್ನೂ ತಂಡಕ್ಕೆೆ ಕರೆಸಿಕೊಳ್ಳುವ ಯೋಜನೆ ಹಾಕಿಕೊಂಡಿದೆ.